Øydelegging av undervassinfrastruktur i Østersjøen den siste tida har ført til auka merksemd for trusselen mot undervass- og energiinfrastruktur på norsk sokkel. Sårbarheiter knytt til undersjøisk infrastruktur, og Russland sine investeringar i kapasitetar for sabotasje av denne, pregar trusselbiletet for sektoren.
Trusselen frå Russland om sabotasje for å svekka støtta til Ukraina kan inkludera angrep på kritisk infrastruktur som røyrleidningar, kablar, innretningar og anlegg.
Verksemdene i petroleumssektoren står overfor ein vedvarande forhøgd risiko knytt til hendingar. Petroleumssektoren er ei høgt digitalisert næring med komplekse leverandørkjeder. Leverandørkjederisiko og aukande bruk av kunstig intelligens (KI) frå trusselaktørar står sentralt i trusselbiletet.
Det er viktig å halda oppe og setja i verk fleire tiltak som reduserer risikoen for og konsekvensane av fysisk eller digital sabotasje. Noreg er ein viktig aktør for ivaretakinga av olje- og gassleveranse til Europa gjennom å halda oppe høg regularitet i leveransekjeda.
Rapportane frå NSM, PST og E-tjenesten understrekar behovet for framleis høg beredskap, sikring og IKT-tryggleik i petroleumssektoren i møte med det komplekse trusselbiletet som næringa står overfor. NSM, PST og E-tjenesten vektlegg auka sannsyn for sabotasje ved bruk av proxy-aktørar, auka bruk av KI og fare for fleire cyberangrep i rapportane sine.
Les også: Årets trusselvurderinger er presentert (regjeringen.no)
Trusselvurderingar 2025:
Nasjonal sikkerhetsmyndighet (NSM)
NSM er Noregs direktorat for førebyggjande nasjonal sikkerheit. Direktoratet gir råd om og gjennomfører tilsyn og andre kontrollaktivitetar på sivil og militær side knytt til sikring av informasjon, system, objekt og infrastruktur av nasjonal betydning. NSM har også eit nasjonalt ansvar for å avdekka, varsla og koordinera handtering av alvorlege IKT-angrep.
«Risiko»-rapporten er NSM si årlege vurdering av risikobiletet for nasjonal tryggleik. I rapporten vurderer NSM korleis sårbarheiter i norske verksemder og samfunnsfunksjonar påverkar risikobiletet, i lys av trusselbiletet som er trekt fram av Etterretningstjenesten og PST.
Les rapporten: Risiko 2025: Et sikkert Norge i en usikker verden (NSM sin nettstad)
Politiets sikkerhetstjeneste (PST)
Politiets sikkerhetstjeneste (PST) er Noreg si nasjonale innanlands etterretnings- og sikkerheitsteneste, underlagt Justis- og beredskapsdepartementet. PST har som oppgåve å førebyggja og etterforska alvorleg kriminalitet mot sikkerheita i nasjonen.
PST identifiserer og vurderer truslar knytt til etterretning, sabotasje, spreiing av masseøydeleggingsvåpen, terror og ekstremisme. Vurderingane skal bidra i utforminga av politikk og støtta politiske avgjerdsprosessar.
PST si årlege trusselvurdering er ein del av den opne samfunnskommunikasjonen til tenesta der det blir gjort greie for forventa utvikling i trusselbiletet.
Les rapporten: Nasjonal trusselvurdering 2025 (PST sin nettstad)
Etterretningstjenesten
Etterretningstjenesten (E-tjenesten) er Noreg si utanlands etterretningsteneste. Tenesta er underlagt forsvarssjefen, men arbeidet omfattar både sivile og militære problemstillingar.
E-tjenesten sine hovudoppgåver er å varsla om ytre truslar mot Noreg og prioriterte norske interesser, støtta Forsvaret og forsvarsalliansar Noreg deltek i og støtta opp under politiske avgjerdsprosessar med informasjon av spesiell interesse for norsk utanriks-, sikkerheits- og forsvarspolitikk.
I den årlege vurderinga «FOKUS» gir E-tjenesten analysen sin av status og forventa utvikling innanfor tematiske og geografiske område som tenesta vurderer som særleg relevant for norsk sikkerheit og nasjonale interesser.
Les rapporten: Fokus 2025: Etterretningstjenestens åpne vurdering av aktuelle sikkerhetsutfordringer for Norge (E-tjenesten sin nettstad)