Styring av vedlikehald
Beskrivelse
Manglande strategi for og oppfølging av overflatevedlikehald
Begrunnelse
Før tilsynet fekk vi ein oversikt over sentrale vedlikehaldsparametrar og det vart gjort ein gjennomgang av dette i tilsynet. I tilsynet gjekk vi meir i detalj på overflatevedlikehald, inspeksjon, KUI og utbetringar. Vi vart informert om korleis dette var handtert med ulike verktøy, leverandørar, tilnærmingar over fleire år og rapportering og dokumentasjon i vedlikehaldssystemet sidan programmet vart innført. Det vart og informert om at ikkje alt av vedlikehaldsprogram er i SAP.
Ved gjennomgang av dokumentet ‘Strategi for inspeksjon og overflatevedlikehold av statisk prosessutstyr TBO’ inkludert oppdateringsdokument så observerte vi at dette er eit dokument i ‘draft’-versjon med utløpsdato 19.5.2020. Dokumentet har ikkje noko dokumentnummer eller noko revisjonshistorikk. Den manglande formelle statusen til dokumentet medfører at det ikkje har ei kopling til styringssystem. Tillegget til strategidokumentet hadde heller ingen forankring i styringssystemet til selskapet. Vi vart informert om at planar og tidsfristar frå den opprinnelege strategien ikkje var følgt, men det var ikkje dokumentert noko formell handtering av dette.
Med den manglande forankringa av strategien for overflatevedlikehald så ser ikkje endringar i program, manglande gjennomføring, vurdering av risiko og eventuelle avvikshandsamingar ut til å vere dokumentert i tilstrekkeleg grad eller synleggjort i måleparametrar.
Hjemmel
Arbeidsmiljøvurderingar for nye metodar i overflateprosjektet
Beskrivelse
Manglar ved kvalifisering og gjennomføring av arbeidsmiljøvurderingar for nye metodar i overflateprosjektet
Begrunnelse
Som ein del av tilsynet fekk vi presentert Beerenberg sitt arbeid i overflateprogrammet på Tjeldbergodden. Vi har etterspurt kva krav Equinor har og kva vurderingar som er gjort av nye metodar og tekniske løysingar i overflateprosjektet. Eit eksempel her var sandblåsing med tradisjonell metode og med ein nyare metode med meir konsentrert sandblåsing og avsug kombinert (merkevare Pinovo). Vi vart informert om at Pinovo var godkjent som utstyr og metode for overflatebehandling i ISO rammeavtalen mellom Equinor og Beerenberg. Metoden vart nytta av Beerenberg i deler av overflatearbeidet på anlegget.
I tilsynet vart det presentert korleis Pinovo var brukt på ein jobb på anlegget i september 2024. Dette vart omtala som ein pilot eller demonstrasjon utført av produsenten. Då vi gjennomførte tilsynet gjorde vi verifikasjonar av ein jobb under utføring med Pinovoteknologi. Gjennom samtalar og verifikasjonar i dokumentasjon etterspurde vi korleis Equinor hadde sikra seg at metoden tilfredsstilte krav med omsyn på kvalitet, sikkerheit og arbeidsmiljø.
Vi vart informert om at det ikkje var gjort arbeidsmiljøkartleggingar eller vurdering av arbeidsmiljørisiko knytt til bruk av Pinovo. Under verifikasjonen i anlegget observerte vi at bruk av Pinovo kunne gje utfordringar knytt til opphaldstid og arbeidsstillingar som til dømes arbeid på underside av røyr, over skulderhøgde, sittande på kne og einsidig og statisk muskelarbeid. Ved påfylling av sand eller tømming av blåseklokke, eller feil bruk av den, så var det risiko for å bli eksponert for støv. Ved verifikasjonen observerte vi bruk av Pinovo utan støvmaske.
Det var ikkje etablert noko eiga prosedyre for bruk av Pinovo eller beste praksis for dei forskjellige arbeidsoppgåvene som utstyret vart brukt til. Det var heller ikkje gjort vurdering av kor eigna metoden var samanlikna med tradisjonell metode for sandblåsing. Vi fekk informasjon om at utførande personell nytta Beerenberg si prosedyre for tradisjonell sandblåsing ved arbeid med Pinovo.
Ut i frå informasjon vi fekk i tilsynet så var det ikkje gjort noko spesifikke vurderingar til bruk av Pinovo sandblåsing mot tradisjonell sandblåseteknologi med omsyn på kvalitet på jobben, tidsforbruk og arbeidsmiljørisiko.
Hjemmel