- Me skal vera ei sterk og tydeleg sikkerheitsmyndigheit, både på HMS og sikring. Me skal vera tett på industriutviklinga og vera eit føretrekt kunnskapsmiljø, både for næringa og departementet, seier Inge Dokken, direktør for strategi og styring i Havtil.

Tildelingsbrevet frå Energidepartementet styrer verksemda til Havtil og viser kva område som skal ha høgast prioritet. Tildelingsbrevet inneheld mellom anna langsiktige mål og strategiar, konkrete mål og prioriteringar, og informasjon om korleis måla skal styrast og følgjast opp.

- Me skal bruka heile breidda av verkemidla våre for å sikra at me oppfyller måla. Dette inkluderer tilsyn, regelverksarbeid, informasjonsinnhenting og - formidling, rettleiing og rådgjeving, fastslår Dokken.

Mål og prioriteringar for 2025

Ansvarsområda til tilsynet omfattar arbeidsmiljø, sikkerheit og beredskap innan petroleumsverksemd, fornybar energiproduksjon til havs, CO2-transport og -lagring og havbotnsmineral, samt sikring i petroleumsverksemda. Havtil skal ha ein kunnskaps- og risikobasert oppfølging av aktørane, og bidra til eit oppdatert risikobilete i næringane.

I 2025 skal Havtil bidra til å nå tre hovudmål:

  • Redusert risiko for storulukke i petroleumsverksemda.
    For å bidra til å redusera storulukkerisikoen skal Havtil følga opp næringa med ei heilskapleg oppfølging, både av arbeidsmiljø, sikkerheit, beredskap og sikring.

  • At verksemdene har eit systematisk førebyggande helse-, arbeidsmiljø- og tryggleiksarbeid og forsvarlege arbeidsforhold.
    Havtil skal bidra til at verksemdene i næringa har eit systematisk førebyggande HMS-arbeid. Dette inneber å evaluera eigne prosessar og bidra til tydelege forskrifter som er godt tilpassa næringa. Havtil skal også følga med på rammevilkår som påverkar sikkerheit og arbeidsmiljø, og bidra inn i relevante partssamansette grupper.

  • At verksemdene har nødvendige sikringstiltak som skal bidra til å hindra uønskte hendingar og sørga for beredskap tilpassa det til ei kvar tid gjeldande risikobildet.
    Havtil skal gjennomføra tilsyn for å bidra til at selskapa sine sikkerheits- og sikringstiltak er tilstrekkelege og oppdaterte. Havtil skal også bidra til at risikobiletet og trusselbiletet er godt forstått i næringa, og vidareformidla relevant informasjon til rettshavarane.

Verdsleiande på HMS

Havtil sine prioriteringar og arbeid knytt til måloppnåinga skal understøtta sektormåla og mål for departementet slik det går fram av Prop. 1 S (2024-2025), med klar ambisjon om at verksemda på norsk kontinentalsokkel skal vera verdsleiande på HMS.