Havtil har tidlegare innhenta informasjon frå alle relevante operatørar knytt til kapasitetskrav til brannvatnforsyning og responstid til fastmonterte anlegg for brannbekjemping.
Ifølgje tilbakemelding frå ConocoPhillips i 2023 og 2024 har følgjande innretningar på felta Ekofisk og Eldfisk avvik mot regelverket når det gjeld responstid for brannvatn:
- Ekofisk 2/4 K
- Ekofisk 2/4 M
- Ekofisk 2/4 X
- Ekofisk 2/4 Z
- Eldfisk 2/7 A
- Eldfisk 2/7 B
- Eldfisk 2/7 S
ConocoPhillips har no informert oss om at dei ikkje har konkrete planar om ytterlegare tiltak for å korrigere avvika, og at dei heller ikkje har konkludert når det gjeld om selskapet skal søke om unntak frå dette regelverkskravet.
Alle responstider er målt ved test av enkeltanlegg (ikkje scenariotest), og er dermed ikkje nødvendigvis representative ved samtidig utløysing av alle system som vil tilføre brannvatn til eit brannområde.
ConocoPhillips har per i dag ikkje oversikt over dei reelle responstidene ved utløysing av brannvatn.
Pålegg
På grunnlag av dette har vi derfor gitt ConocoPhillips følgjande pålegg:
Med heimel i rammeforskrifta § 69 om enkeltvedtak, pålegg vi ConocoPhillips å:
- sørge for at fastmonterte anlegg for brannbekjempelse på alle sine innretningar er utforma slik at brannbekjempelse til ei kvar tid kan gå føre seg hurtig og effektivt, jf. innretningsforskrifta § 37 første ledd, jf. styringsforskrifta § 22.
- utarbeide ein forpliktande og tidfesta plan for å etterkome pålegget over, jf. styringsforskrifta § 22.
Frist for å etterkome punkt 2 i pålegget er 12. mars 2026. Frist for etterkome punkt 1 i pålegget vil gå fram av ConocoPhillips sin tidfesta plan, jf. punkt 2 i pålegget.
Vi skal ha melding når pålegget er etterkome.
Brannbekjemping
Havtil utarbeidde i 2025 ein rapport for kunnskapsutvikling og erfaringsoverføring til næringa relatert til kapasitet til brannpumper og responstid for fastmonterte anlegg for brannbekjemping.
Les rapporten her: Brannvannforsyning og fastmonterte anlegg for brannbekjempelse - Kapasitet til brannpumper og responstid