Equinor - Snøhvit og Hammerfest LNG - drift og vedlikehald

Planlegging og bemanning

Beskrivelse

Manglar ved kapasitet til å få gjennomført drift og

Begrunnelse

Noko av målet med tilsynet var å følgje opp korleis Equinor styrer aktivitetane på Snøhvit og Hammerfest LNG, korleis ein samhandlar mellom einingar som er ansvarlege for ulike deler av anlegga, og korleis ein sikrar at det er tilstrekkeleg kapasitet i organisasjonen til å få gjort det arbeidet som er til ei kvar tid.

I tilsynsaktiviteten såg vi spesielt etter korleis røyr og undervassanlegg er integrert inn i landanlegget og kven som er ansvarleg for dei ulike delene og systema. I forkant av tilsynet bad vi om organisasjonskart for Hammerfest LNG og Snøhvit, og vi har gjennom samtalar og presentasjonar prøvd å verifisere opp mot denne dokumentasjonen. Det var under tilsynet vanskeleg å danne seg eit bilete av korleis dei ulike avdelingane samhandlar på ulike nivå i organisasjonen.

Det vart gjennom presentasjonar og samtalar kommentert og uttrykt bekymring med omsyn på bemanning innan deler av organisasjonen for Hammerfest LNG og Snøhvit. For oppfølging av til dømes røyr og undervassanlegg har det vore ei endring som gjer at ein har mindre tilgjengeleg personell lokalt med relevant kompetanse, at det har vore ei rekke utskiftingar, periodar med sjukefråvær, utfordringar med rekruttering og stor arbeidsbelastning for enkelte. Vidare kom det fram at det på Snøhvit og Hammerfest LNG er utfordringar knytt til å få gjennomført planlagt vedlikehald og driftsoppgåver, både på landanlegget og det som er i havet. Oversiktar som vart vist i tilsynet, viser ei større mengde med vedlikehald som er uestimert og det er ei stor mengde vedlikehald som er korrigerande. Det har og vore vekst i etterslepet for vedlikehald den seinare tida.

Krav i forskrifter seier at ein til ei kvar tid skal ha tilstrekkeleg med ressursar for sikker drift utan at det er spesifikke krav til korleis ein organiserer dette. Ein kan ha eigne tilsette lokalt, ein kan få teknisk støtte frå andre stader i organisasjonen, og ein kan leige inn personell både lokalt og andre stader. Uavhengig av korleis ein løyser dette så må dei personellressursane som er nødvendige, vere tilgjengelege (kapasitet), dei må vere sett i stand til å kunne utføre den jobben dei er sett til (kompetanse), og det må vere klart definert korleis kommunikasjonen skal vere (organisering). Hammerfest LNG med Snøhvit er eit komplekst anlegg, dette vart understreka av fleire, og det krev ein viss grad av lokal kompetanse og opplæring for å kunne jobbe der. Den anleggsspesifikke kompetansen er særs viktig for å kunne gjennomføre planlagde og uplanlagde jobbar. Gjennom presentasjonar og samtalar kom det fram at ein i ei viss grad er styrt av hendingar som kan gå ut over evna til å gjennomføre det ein har planlagt. Det medfører at ein nyttar mykje tid på å handtere hendingar som oppstår i drift, noko som gjer at planar må skyvast på og det blir mindre tid til å gjere vurderingar av tilstand for barrierar på innretningane.

Hjemmel

• Styringsforskriften § 12 - Planlegging

  (sist endret: 01.01.2011)

• Styringsforskriften § 14 - Bemanning og kompetanse

  (sist endret: 01.01.2011)

  første ledd